الغدة الدرقية وقصورها

 السلام عليكم

اليوم موضوعنه عن الغدة الدرقيه وقصور الغدة الدرقية
الموضوع راح اطرحه بمنشورين الاول راح نتكلم عن الغدة بشكل عام والمنشور الثاني راح نتكلم عن قصور الغدة ان شاء الله
منو بينا ما سامع عن الغدة الدرقيه وتحليلها؟؟
نروح لدكتور القلبيه يكتبلنه تحليل غدة درقيه، نروح لدكتور باطنيه يطلب تحليل للغدة الدرقيه، النسائيه، الجراحه وحتى النفسيه هم يطلب تحليل للغدة الدرقيه!!!
يا ترى شنو علاقه هاي الغدة بكل اجزاء الجسم ؟؟؟
بالبدايه لازم نعرف شنو هي الغدة الدرقيه؟?
الغدة الدرقيه هي واحده من الغدد الصم الرئيسيه بالجسم endocrine gland وكلنا نعرف ان الغدد الصم هي الغدد عديمه القنوات ductless وانما تطرح محتوياتها مباشره للدم
موقعها?
تمتد الغدة الدرقيه من الحنجره الى حلقات الرغامى العليا في وسط الرقبه اي تكون محتضنه للممرات التنفسيه "الحنجرة،الرغامى" وتكون على هيئه فصين "يمين ويسار" مرتبطان من المنتصف بمنطقه تسمى isthmus فتاخذ شكل الفراشه

وظيفتها?
تتكون الغدة الدرقيه نسيجيا من نوعين من الخلايا:
1. Para follicular cells
المسؤوله عن افراز هرمون calcitonin المهم بتركيز الكالسيوم بالعظام
2. Follicular cells
هي الخلايا الرئيسيه الي راح نشرح عليها وهي تفرز هرمونين T3&T4 اللذان يصنعان داخل الغده بواسطه سلسله من العمليات وبمساعده عدد من الانزيمات، المادة الاوليه لصناعه الهرمونين هم اليود وحمض اميني اسمه tyrosine بعد صنع الهرمونين راح ينخزنن داخل الغدة ويتم الافراز حسب الحاجة علما ان المخزون يكفي ل 2_3 اشهر !!!
هرمون T3 هو الهرمون الفعال الي تستفاد منه الخلايا اما T4 فهو غير فعال inactive يتم تحويله عن وصوله لخلايا الجسم الى T3 عن طريق فقدان ذره يود واحده لكن T4 هو الهرمون الاكثر افرازا من الغدة الدرقيه اما T3 فيفرز بكميات جدا قليله بمعنى اخر اغلب الهرمونات المفرزه من الغدة الى الدم تكون على شكل غير فعال يتم تحويلها الى فعاله عن وصولها لخلايا الجسم المختلفه
هذني الهرمونين من الهرمونات المذابه بالدهن وليس الماء يعني lipid soluble ونحن نعرف ان المكون الرئيسي للدم هو water
زين شلون انقل دهن بداخل ماء؟؟
الجسم علمود ينقل شي دهني او مذاب بالدهن بداخل قنوات مائيه يحتاج الى ناقل carrier وهذا الناقل هو بروتين هنا اسمه thyroid binding protien "TBP
واحد يسأل زين هاي الغدة منو اليحكم بيها وشلون تعرف بأي وقت تصنع T3,T4 ؟
الغدة الدرقيه مو بكيفها تشتغل وانما اكو مدير يتحكم بشغلها هذا المدير هو الغدة النخاميه وبالضبط الفص الامامي للغدة النخاميه "anterior piruitaty gland" عن طريق هرمون اسمه الهرمون المحفز للغدة الدرقيه thyroid stimulation hormone اختصاره TSH ونحط ببالنه نقطه ان كل هرمونات الغدة النخاميه هي مذابه بالماء وبعدين نعرف ليش هاي النقطه مهمه
زين الغدة النخاميه شلون تشتغل وتفرز TSH ؟
الجواب ان منو اليتحكم بالمدير اكيد المسؤول وهذا المسؤول هو hypothalamus وهي جزء من الدماغ عن طريق هرمون Thyroid releazing hormone "TRH" يعني نكدر نرسم مخطط
TRH----------?TSH --------? T3+T4
زين بأي وقت توقف الغدة الدرقيه صنع هرمون T3,T4 ؟
من يزداد تركيز الهرمونين بالدم راح يتنبه الدماغ وبالاخص Hypothalamus لهاي الزيادة فتوقف افراز TRH وبالتالي الغدة النخامية ما يوصلها ايعاز فتوقف افراز TSH وبالتالي ماكو ايعاز للغدة الدرقيه فيوقف افراز T3,T4 هذي المنظومه نسميها negative feedback mechanism
وبالعكس اذا قل تركيز T3,T4 بالدم راح واحد يحفز الثاني حتى ينفرز ال T3,T4 وهاي المنظومه نسميها positive feedback mechanism واغلب هرمونات الجسم يشتغلن بنفس ذني المنظومتين
شنو فوائد هذني الهرمونين T3,T4 ؟
هرموني الغدة الدرقيه مهم بالعمليات الايضيه metabolism لكل اجزاء الجسم
يزيد تركيز السكر بالدم ، يكسر الدهن المخزون بجسمنه للحصول على الطاقه، مهم ببناء البروتين، مهم لتطور وسلامه الجهاز العصبي، مهم بوظيفه كل عضو بجسمنا
ملاحظه T3 هو اختصار ل triiodothyronine
اما T4 هو اختصار ل tetraiodothyronine
المعلومات الوارده هي من ترتيبي اعتمادا على الشغلات الدارستها فيحتمل بيها شيء من سوء الفهم
اتمنى استفدتوا واي معلومه عدكم تخص الموضوع تكدرون تنزلوها بالتعليقات
تحياتي/ Z.J